अध्यक्षीय मनोगत

सस्नेह सादर नमस्कार! श्री गुरुकुलम् न्यासाची संस्थापक अध्यक्षा मंजिरीताई फडके आपल्याशी संवाद करीत आहेत. संक्षेपाने व्यक्तीगत ओळख तसेच श्री गुरुकुलम् न्यास संस्था स्थापनेची पूर्वपिठीका

आई आशालता आणि वडील मोरेश्वर यांच्या कडून वाचन, लेखन, वक्तृत्व, अनुशासन यांसह सामाजिक सर्वसमावेशकतेचा समृद्ध वारसा प्राप्त झाला. सासरी आल्यावर राष्ट्रीय स्वयंसेवक संघ आणि राष्ट्र सेविका समिती या संघटनाशी घट्ट नाळ जोडली गेली. जीवनसमृद्धीसाठी विविध पैलूंचा व्यक्तीमत्व जडणघडणीत विकास होत राहिला. शालेय विश्वातील हुजूरपागेच्या शिक्षकांकडून निरलसपणे दिलेले ध्येयसमर्पित योगदान कोरले गेले. पुढे कॉलेजविश्वातून उत्तम यश संपादून एका प्रथितयश संस्थेमध्ये अध्यापक म्हणून सेवा करण्याची संधी मिळाली. २५ वर्षे कार्यरत असतानाच वनवासी कल्याण आश्रम या संघ परिवारातील संघटनेची पूर्ण वेळ प्रचारक म्हणून बिनपगारी रजा घेऊन सेवा कार्य करता आले. भारताच्या एका वेगळ्याच दूरदराज क्षेत्रात, संस्कृतीची पताका अखंड उंचावत ठेवत, परिस्थितीशी झगडत समाधानी वृत्तीने जीवन कसे जगावे याचा वस्तुपाठ मिळाला. भौतिक विकासाची आस असली तरी वाट सापडत नव्हती त्यांना!

वनवासी कल्याण आश्रमाची कार्यकर्ती म्हणून या कार्यात खारीचा वाटा उचलण्याचे भाग्य यजमान मधुकर फडके यांच्या संगीसाथीमुळे प्राप्त झाले. याच कालावधीत चिंतन मननातून प्रेय ( भौतिक,व्यावहारिक, नश्वर)आणि श्रेय (शाश्वत,स्थिर, तृप्तता) याविषयी उत्सुकता आणि असोशी वाढली. चि. नरेंद्रचा उंचावणारा शैक्षणिक आलेख जाणून स्वेच्छानिवृत्तीचा निर्णय केला. माननीय श्री. रेणावीकर आणि श्री. देव यांच्या संथावर्गातून भगवद्गीता शुद्ध उच्चारणाचे धडे गिरवित असताना समोरच्यातील सज्जनत्त्व जाणण्याचे महत्त्व लक्षात येऊ लागले. आदरणीय वसुधाताई पाळंदे यांच्या प्रेरणादायी, आश्वस्त करणाऱ्या व्यक्तीत्त्वाच्या सान्निध्यात बीजारोपण कसे करावे, अंकुराच्या रक्षणाचे दायित्व कोणते हे जाणता आले.

२०१३ साली मुलगा, सून, नातू, पती यांच्यासह ठाणे जिल्ह्यात कल्याण येथे स्थिर होण्याचे निश्चित केले. इथूनच जीवनाला ध्येय प्राप्त करून देणारी कलाटणी मिळाली. २०१३ साली गीताजयंतीला श्री लक्ष्मीनारायणाचा वरदहस्त लाभल्यावर, तेथील विश्वस्तांच्या मन:पूर्वक सातत्यपूर्ण सहकार्याने पायाभरणी होऊ शकली. गीताधर्म मंडळाच्या भरभक्कम पाठिंब्यानिशी श्री गुरुकुलम् न्यास संस्थेची मुहूर्तमेढ रोवली. कोरोना संकटातून सावरत असताना स्वयंपूर्ण होण्यासाठी सक्षम असण्याचा विश्वास आला. दहा वर्षांच्या कालावधीत असंख्य निरलस, नि:स्पृह कार्यकर्त्यांच्या मेळा जमला. श्री गुरुकुलम् न्यासाचा कार्यविस्तार विविध आयामाद्वारे ठाणे, रायगड, नाशिक, पालघर या चार जिल्ह्यात होत आहे. त्याविषयी आपल्याला याच संकेतस्थळावर माहिती मिळत आहेच. आपल्या स्नेही, सक्रिय सहभागाची श्री गुरुकुलम् न्यास प्रतीक्षा करीत आहे.

जय योगेश्वर!!!